DAY 
今日o既早餐豐富很多，有蛋、火腿、各種麵包、蜜糖等等．．．我仲拎左一樽小蜜糖比老大添！ 餐後繼續前往另一城市 ── 布魯日，今日參觀比較有特色兼有趣的市場。據說呢個市場並唔係日日開的，好像只係一星期裏開一兩天。
歐洲人生活方式同情況都唔似香港人，歐洲地大脈博，大至出外活動，小至買日常用品，往往都要開車去。所以每一次市場開工，佢地都會大量買，因為下一次可能會係兩、三日後，甚至係一星期！ 呢個市場有新鮮肉類、麵包、水果、蔬菜、鮮花、朱古力、熟食、烤肉等等．．．好似一個露天o既綜合街市一樣。我地買左一D新鮮o既蛋糕仔上車食。逛過市場後，我地爭取機會逛左一陣商店，總括來講，呢個國家已經進入左減價潮，因為每一間商店買有折扣，只是我地無時間行！
午餐於廣場旁邊o既一間中式餐館 ── 長城飯店。嘩！真係幾有親切感 ── 個名！唔好以為呢ｄ餐館無也人幫襯，現場所見滿是外國人，原來個個都係「識途老馬」，佢地叫o既都幾正同貴，真係識食。不過係外國地方食唐餐都係一頸血架啦，夠擔死一碗雲吞麵成六、七十蚊！真係搵ｄ老外笨！好彩我地跟團包餐ｏ姐！
食完又可以做「元帥--」，因為下一站係荷蘭，又花了半日o既時間，大概黃昏時候到左 ── Amsterdam，呢度天氣唔係咁好，之前應該落大雨，滿街濕滑兼有「毛毛雨」。 我地首先參觀荷蘭木屐工場，呢度有一位示範人員居然識講廣東話，可知香港人o既足跡真係遍佈歐洲。呢個工場面積唔係好大，我地睇完一輪，買左一ｄ手信同照相後就上車休息。
大家坐左咁耐車，各位神志都唔係咁清醒，有見及此，領隊即刻醒ｄ好節目比我地o歎！參觀紅燈區。由於呢ｄ都係敏感地帶，所以係唔比人攝錄拍照，免得過大吉利是有入無出，大家都係乖乖地收埋晒ｄ機喇！中國人迷信嘛，一定要出入平安！ 經過外邊參觀後有以下形容（只係外觀，一定無內進！）：街上燈光黑沉，顯出有ｄ fancy感覺。裏面有４仔影碟鋪，有「Senior Manager」用品商店，有植物商店 ── 草（大麻），以及小型單位出租。呢ｄ小型單位，每個間格一樣，有落地大玻璃，激幻燈光，單人床一張，女性服務員一位，各單位收費劃一Eur50（但係我都唔知係「時計」定「次計---」）。由於地方間格同設備都係一樣，因此「租住--」人仕只係挑選心目中喜愛o既服務人員。 各服務員o既制服都係劃一 ── 內衣，只係款式、大小、顏色、透徹度不同。而服務員有高、矮、肥、瘦、大、細、平、詩文、狂野、住家樣樣有齊。任君選擇，只需Eur50。 話說當中有個小插曲，我地團中有一位好粗魯o既阿叔，佢時時招招積積，起初我相信各團友都唔係好鍾意佢，但係自從佢係瑞士買左一隻十幾萬港幣o既勞力士之後，有ｄ團友對佢另眼相看，更以「契爺」稱呼。佢成日都問領隊係咪去紅燈區，又問要幾錢，無有怕一定要試咁！點知去到當日，佢竟然縮沙，各團友及領隊更大力支持佢，只要佢做就請佢！當佢正在猶豫之際，企係落地玻璃內之服務員竟然望住佢“晒”手擰頭，唔做佢生意，當場瘀到爆燈。更死雞撐飯蓋，要做都搵個靚ｄ。阿叔，你自己檢詩一下啦，連服務員都唔賺你錢！
而晚餐就照舊係中菜，有湯有魚有肉，樣樣例牌，餓你唔死！之後又到壓軸遊戲，首先領隊比我地解除束縛，返房各自休息梳洗，小休後過對面馬路o既賭場博殺。場內環都幾舒服同乾淨。各人都要出示Passport登記才可進入（我諗係防止國際老千！）。 首先戰死於輪盤Eur 30，再而又死於21點Eur 70（都算黑仔，十鋪有九鋪係15,16點！），玩到冇心機之際，反而戰贏老虎機，贏左Eur 12，最後合計輸了Eur 87，算啦！黎咁耐都無乜買野，當買左個experience！（都幾貴） 離開後，見賭場旁有間Hardrock Cafe，順道買左兩件T-shirt。手抱住T-shirt，心裡懷著失落返酒店睡覺！ |
_
