早餐依舊，仍然要食。由於今日”九天團”o既團友返香港，佢地早上可自由活動，乘坐下午飛機返香港。而剩低o既戰士們就繼續上征途，呢架旅遊車頓時變得冷清。

今日第一個景點係法國Disneyland，由於歐洲已經過左新年假，所以場內都幾冷清，加上天寒地凍，我覺得好似去左荔園一樣，園內每一種遊戲我都唔係好想玩，講真同日本個feel真係唔同，人真係好衰，唔爭唔好玩，唔爭唔馨香。

但係呢次居然可以比Debbie同老大同法國Pooh一齊映相，場面真係溫馨、感人，但係我呢個攝影師就係寒風之下飽受煎熬！終於我地玩左火車，小小世界．．．就算喇。

(Debbie按：法國Disney有兩邊，分別係Disneyland及Disney Studio，我地個團係包是但一邊的入場票，即係你只可以去是但一邊玩，有些團友去左Studio個邊，返黎話搵笨！而Disney所賣o既野係唔靚！都係日本仔D野正好多，我咁鍾意Pooh Bear，都只係買左一個隔熱手套同一隻公仔，其他完全係買唔落手！不過最最最大收獲就係可以同到法國老大Pooh Pooh影相。

我同ｄ小朋友一齊排隊等影相時，見到佢地一人一本簽名簿，咁我就問後面個個小女孩可唔可以比張紙我，真係差家啦，人人都用簽名簿，我就用一張撕下來o既紙，不過都唔個晒個位好sweet o既妹妹仔。我一路等，一路睇住前面ｄ小朋友見到Pooh Pooh時係點，佢地一見到阿Pooh就好嗲好lum咁攬實阿Pooh，由於佢地o既高度係去都Pooh Pooh o既肚腩，佢地就伏係佢肚腩度，表情係極之嗲架！另外有個好靚仔o既法國男仔同完阿Pooh影相後，錫左阿Pooh一啖！不過Pooh Pooh真係好受歡迎，ｄ法國人一見到佢就狂叫”Winnie”！[留意佢地唔係叫佢做Pooh！]到我時，我一見到佢，本來想好似小朋友咁攬住佢，但係佢只係搭我膊頭影相，嗚嗚．．．雖然我唔係小朋友o姐，做乜唔比我嗲嗲呀！咁我就同佢講“Can you give him a hug?”，佢就抱住我老大啦，勁開心！我仲叫佢同我簽名，走時又錫左佢一啖，我真係死唔執輸架，最後我同老大都好開心！老大比佢法國老大一抱，真係好光榮架，希望佢可以比埋其他國家ｄ老大抱就好啦！)

今日午餐係自費，所以食乜都得，甚至龍肉都得，只要自己”科”水。我地去左Disneyland對面廣場中o既Planet Hollywood。入廣場時唔知點解要排隊check bag及要過金屬探測器。我地食左個Set-lunch，有湯或沙律，主菜有薯蓉加朱肉片兼有可樂一杯，價值Eur 12一位。我地又買左一d Planet Hollywood T-shirt。

通常有云”食飽睡一睡，好過做元帥“，呢個禮拜已經養成午餐後係車度午睡，講真，呢ｄ先叫做生活！

又搭左4個鐘，去到另一個國家　──　比利時。黎到布魯塞爾(Brussels)，去到好靚好有特色o既布魯塞爾廣場。四邊都被古老建築物包圍，當中有歌德式設計的市政廳，係不同燈色的影射下，更見特色宏偉。真係好靚！而今次黎呢度主要原因係去睇一個“撒尿小童”的銅像。點解要去睇一個咁o既像？因為話說係一場戰爭中，敵方想炸布魯塞爾呢個城鎮，而呢個小童就柯尿係炸葯火線頭，將這個災難避過左，救左百姓，因此而建立呢個像紀念啦。係廣場度，仲有一個博物館，展示各國送給小童像的服飾，領隊話當中中國都有送上中國服飾。個銅像係位於布魯塞爾的小巷內，去到銅像前，先發現係一個好小好小的銅像，不過佢有著衫架！

係行去睇撒尿小童像前，我地仲經過一個好瘦同埋都幾恐怖下o既銅像前，佢係紀念一位醫生o既，領隧話摸摸佢會身體健康，個個團友都即時摸摸及同個像影相喇！

參觀完銅像後，又係shopping時刻啦，黎比利時，梗係買Godiva Chocolate喇！不過後來發覺係英國機場仲平！頂！

晚餐係一間好有特色o既中國餐館進食，菜單有黃花魚、燒肉，好耐都無食過，今晚好飽呀，正！

今晚所住o既酒店其實係一間賓館，連行李都要自己從旅行車拎入酒店，再自行拎上房。而我發覺呢個酒店員工真係萬能，check-in, check-out counter係佢，幫手拎行李又係佢，接電話又係佢，真係好慘！可能係老細，樣樣親力親為．．．無論邊度，世界難撈！