又o係食急凍早餐之後，開始今日o既行程。天氣都係好大霧，好厚雲兼好凍，，因為今日好些少啦，差少少就可以見到塔頂，所以係各團友一再要求下，我地第一個景點都係巴黎鐵塔，因為大家都係想影張清D好D o既相，除左指定動作影相外，所有人都買紀念品。話說當我地架旅遊車停定之際，有五、六個皮膚粗黑，樣子兇神惡殺o既人向我地兜售紀念品。大家經過一輪議價之後，我地兩人“拾死雞”用左Eur4買左兩大兩小鐵塔做手信，OK喇！我都唔知平定貴，總之人買我買，羊群心態！

與此同時，有一位講廣東話o既local guide上左車，佢會用上半日介紹巴黎，例如「拿破倫之墓」、「巴黎聖母院」等．．．我地重係聖母院對面o既Cafe“o搭”左兩杯Cappuccino (Eur10)，即時覺得充滿花都文化o既力量．．．之後又遊覽香舍麗舍大道同凱旋門。係自由活動途中，見到有一間幼兒園，從窗口見到D小朋友係度食上緊堂，我地就係咁用Pooh Pooh撩佢地玩，佢地最後有個都望到過黎，同我地（其實可能係阿Pooh）揮手，好鬼得意！之後返轉頭見到佢地係度食緊餐，嘩！十一點幾，食早餐定午餐呀？抑或兩餐夾埋一餐咁克薄呀！頭先個小朋友又發現我地，再之同我地揮手微笑，佢隔離個個都有，仲好識搶鏡咁霸頭位貼實道牆同我地揮手。

（Debbie按：我地去Cafe時，其實只剩低十分鍾時間集合，由於一場黎到，我地老死都要扮晒優閑同文化界咁係法國o既Coffee Shop度歎返杯coffee！入到去快速地order，因冇Mocha所以叫Cappuccino，心諗死啦，ｄ外國人做野勁慢，會唔會要成十分鐘先黎呢？點知冇耐就到啦，效率如香港，咖啡黎度後我地極速咁飲，完全唔似法國人咁好優雅地慢慢歎！勁搞笑！）

快樂o既時間特別快過，又到左午餐o既時候。午餐亦都係中餐，但係我覺得呢餐好好味，因為有火腿炒蛋同“古”嚕肉。

文化氣息停不了，餐後繼續去羅浮宮。拿！唔係九龍塘呢間，而係法國間堅野！又係一樣，呢程有另一位講廣東話o既local guide介紹，而且據講係博士，都幾光榮架，有個香港人係羅浮宮裏面做野，聽講佢鐘錢都幾貴架添呀！而經過o既同事都會同佢打招乎。我地用左兩小時高速地參觀重要o既文物，裡面有雕塑、大大小小o既畫、獅身人面像等．．．導遊博士話有三樣野一定要睇　──　1. 蒙羅麗莎 2. 勝利女神像 3. 維納斯女神像。但係一入門口已經有一個微型獅身人面像,佢話己經有過千年歷史，一定要影佢。嘩！經過大半日o既行程，頓時覺得充滿文藝o既細胞，滿口打油詩．．．

(Debbie按：裡面真係好多野睇，如果唔係有個講廣東話o既guide講解內容，我地真係唔知ｄ雕塑及畫o既來歷點去欣賞，由其是ｄ畫，佢唔講解我真係睇唔出乜野立體，乜野唔同左．．．)

好喇，一場黎到花都。無理由各戰士們會輕易放過呢次機會，下一站巴黎兩間老牌百貨公司　──　春天Printemps同老佛爺Lafayette。各戰士即時審問領隊邊一間有LV，我諗佢地真係想買起佢！原來只有老佛爺至有，各位一窩蜂趕去戰場，但係好景不常，呢個戰場已經充滿其他戰士，我地o既團友只好乖乖排隊受死，真係排長龍個隻喎，聽D團友講呢一間LV有D特別，係無Catalog睇（我諗係外國係好common，應該係玩即興）！但係各店員都好有耐性聽你形容個袋，無論你劃、講、同做動作都得。

由於我地會stay behind係London，所以無排隊幫襯同人逼。我地轉戰Agnes B, Longchamp及化粧品，費時浪費時間。佢地計落都有Jetso，扣完稅都平過係香港買。

經過數小時o既戰鬥，戰士們手上都有大包細包o既戰利品，而我地班男性個個都重傷兼流血不止，各女性隊員都歡天喜地。

晚餐時間又到啦，戰士們一齊保充體力。呢餐係法國餐，餐單有龍蝦湯、鵝肝沙律、鴨胸肉或魚同蘋果批，最重要係法食法國餐點少得一杯紅酒襯下。原本呢間餐廳環境同裝修都好正，但最衰隔離有一班大陸人個個鬥打國產煙炮，全場一陣中國o既氣味，極之嘔心！

返到酒店，有D團友提議出外行街，但係宜家已經係九點多，而且聽講巴黎地鐵同街上o既晚上治安都唔係好好，所以決定留房休息。