照例Morning Call，食冷凍早餐。我覺得今日第一個景點同我地好似　──　垂死獅子像。呢幾日都要晨早起身兼坐長途車，宜家叫我咁早影相，我就好似一條死屍棟係度影相，所以D相真係灰灰黑黑。

影完相，返上車”訓”覺，因為全日都係坐車由瑞士去巴黎。每隔一段時間司機就會放我地休息同痾尿，我地就可以落車伸一伸，不知不覺又過左4個鐘，到左午餐o既地方　──　波本 (Bourbon)。

呢間餐廳都幾有鄉村feel，幾正！而菜單有磨菇朱扒加炒通心粉，青豆湯和雪糕，味道都OK啦，但係仍然份量好少（Debbie按：我覺得份量OK喎，大食積！），真係唔飽。餐後又有指定動作　──　到處影相，呢到有一位幾靚仔o既Waiter，應該係太子爺，佢即刻成為搶手o既目標！

真係唔想肥都唔得，雖然餐餐唔飽，但係永遠都係一食完就上車”訓”覺。又過多4個半鐘（本應可以早D，因有traffic jam阻礙了40分鐘）。到達巴黎已經係7:00 pm，首先又係食飯（唔係食就”訓”，好似豬一樣）。晚餐菜式為中菜，都係一般啦，白飯任裝．．．

食飽飯，無理由今日行程得一個咁少。嘩！誰不知重頭戲?喇，坐平底超級大架兼唔會暈船浪o既船暢遊塞納河，呢架船分為兩層，第一層為內有暖氣供應（我諗夏天去會有冷氣o掛！），第二層為室外，你知啦，影夜景最好要o係船頂影，你諗?喇，架船有一定o既速度，加上天氣特別寒冷會產生好強大o既冷風，足足凍左45分鐘（全程為一小時，最後15分鐘係室內取暖??！）。

沿途o既夜景真係好靚，有皇宮、博物館、鐵塔，更經過豪宅區，花都o既夜景真係好迷人。雖然真係好凍，但係都值得．．．

船又玩過喇，第三個景點係每個遊客o黎巴黎必去之處──　巴黎鐵塔。由於今日o既行程推後左，宜家遊塔o既人都唔係好多，我地好易好快就上到鐵塔第一層，但係入口處係需要搜隨身物！防止有人炸塔。

好景不常，由於今晚太大霧，所以根本睇唔到巴黎風景。之前旅遊車經過巴黎鐵塔時都霧到只係見到塔腰，腰以上至塔頂完全睇唔到！（Debbie按：真係要講句矇個蒙古！本想係塔上面影返張香舍麗舍大道，但係好矇，一D都影唔到呀！霧都巴黎真係完全收到！不過剛好時間搭正，個塔有閃燈開放，猶如Disco。我地係塔上面歎完咖啡左幾張相後就喇。無論點有機會登上巴黎鐵塔都係好開心o既事。（Debbie按：絕對係啦，因為係東京o個個我地都冇上去，因為要自己比錢嘛，又唔係抵，所以冇上過去喇！）

好喇，今日o既行程真係完，返酒店大覺”訓”。(係車又訓,宜家又訓。一日有2/3時間訓覺，都幾浪費！)