早餐照舊好老土,但係都要食。但係我只係扒2啖就走。嘩！呢個係咪減肥團？

又一程長途車喇！意大利 --> 瑞士。指定動作，一上車各團員已自動進入冬眠狀態。乖乖地”訓”覺，由於係長途車，司機每個多小時便會在油站停低休息一陣。（係歐洲o既司機，每天工作有時限──大概8-9小時，而每個半至兩個小時便要休息15分鐘。真歎！）

沿路可以看見西方童話式的小木屋同好靚o既景色，猶如飄零燕卡通片中的風景。（Debbie按：真係以為自己係童話世界呀！）車程到了一半之後，山邊同公路旁都有積雪，而且我地亦穿過歐洲最長o既隧道（辛普倫隧道Simplon Tunnel）。當旅遊車駛入瑞士時，我地係唔需要落車過關（不過據領隊講唔係次次都唔駛落車架！）。從道路上的特色、路牌、路燈你可以分辨到已進入另一個國家。

瑞士除左有鐘錶國之稱呼外，亦有隧道國之稱，沿途都唔知已穿過多少條隧道。大概中午時間到達左琉森市。Oh！戰士們起身喇，另一個戰場就到。大家都知，係瑞士除左買瑞士糖之外，好多香港人會買o既　──　Lindt朱古力，No！梗係五支火柴頭喇！

未落車，D團友已經好湧躍問呢D問題：係唔係呢到平D？呢D係唔係瑞士做？究竟有冇呢D款？一輪咀問好多野．．．但係最重要係有冇折！

旅遊車停係錶鋪(Bucherer)出面，領隊係大家落車前派發一張換領免費獲贈「勞力士匙羹」一支的贈券，大家應該收隊喇，Wo！唔駛錢已經有「勞力士」──　匙羹，其實呢間公司分好多層，有唔同牌子名錶同紀念品賣，我地首先買左2個瑞士音樂盒。（記住！瑞士係用瑞士法郎。）

繼而步入戰場，有敵人已經霸位搶閘。另外有D敵人到處偷聽軍程，買乜野款？幾錢？有乜送？甚至有D奸細挑撥離間：呢個款香港平D，呢個款最新啊，呢個色靚D。（Hello！唔買就彈開喇，駁有贈品啊！）最後我老婆贏左呢場硬仗，戰利品「勞力士」一隻。可憐o既我就戰死沙場，流血不止！（聽講瑞士o既醫術好高喎，唔知可唔可以醫好缺乏維他命M o既病人呢？）

（Debbie按：本想買兩隻，諗住 “R” discount，但係佢地點都唔比discount！所以嬲嬲地就只買一隻，反正唔係平過係香港買，因為我地今次黎歐洲d歐元勁升！咁我地就只係買一隻當係黎過歐洲買過有個紀念，不過之前領隊已講左話唔會比香港平，不過就保證全部連裝勘都係瑞士，香港個d裝勘係星加坡，分別於此。）

好喇，經過一輪戰鬥原來已經係十二點多。個肚開始打鼓喇！但係好衰唔衰呢個午餐要係鐵力士雪山上面食，真係人都癲。到達雪山之山腳後，領隊派發吊車入場卷開始登山，唔好為人小小就好快到，由於西方人工作心態係慢慢做o既，轉左3次形式不同的吊車（1. 六人一車，對坐形式； 2. 30人一車，方形鐵式； 3. 50人一車，洗衣機自轉式），到達目的地時已經係三點左右。由於山頂有成一千公尺而氣溫為零下10oC所致，空氣稀薄加上早已餓到腳軟。我地用埋最後D奶力爬去餐廳。好彩，呢餐都無令到我地失望，有瑞士雞翼（正）、烤大肉腸、菜、意粉、雞湯及蛋糕（最重要係有添食！）

填飽個肚後，爭取時間到室外雪山頂影相，我發覺D影相機button o既設計應該要方便冬天戶外使用o既朋友，呢方面我深深體會到。由於天冷，好自然會戴手套，但時下之數碼相機越出越細，粒“的”當然會細D，我戴左手套之後根本就感覺唔到粒“的”。最後我o既肉手冒住寒風博鬥15分鐘，途中感覺隻手就好似“luck”左一樣，無晒知覺！

以下有一段恐佈o既小插曲。話說雪山之旅都差不多完喇，到左集合時間，大概有一半以上o既團員已經達集合地方。呢刻領隊都好目，佢見宜家開始多人落山，建議不如分批落山係入口處再集合。經領隊初步點名後，各人紛紛下山到達入口處，各人不以為然，大概五點半大部份人都已到達甚至連領隊都到左。但係突然晴天霹靂．．．

原來發現在兩位團友唔見左（佢地係一pair年老o既叔叔嬸嬸），而呢個領隊好似不知所措，仲話都未試過咁，其他團友見狀即刻叫領隊打電話比佢地，但佢又唔打。叫佢去通知滑雪場我地有兩個人唔見左，佢又唔肯。又叫過佢用大咪廣播，又唔肯，報警又唔肯。宜家情況越來越危急，因為天開始黑，吊車陸續停止，如果佢地兩個真係仲留係山頂，分分鐘可能凍死。大家越心急，領隊就越縮。

大概一小時之後，有兩個人影從吊車站走出，而且越來越近。Oh！原來係呢對叔叔嬸嬸，當佢地上車後，大家都拍手掌，好似再一次歡迎佢地加入。（其實可能係大家知道終於可以繼續行程！）

據講：原來佢地兩人聽錯左集合地方，由於山上o既車站係有三層，（2/F餐廳，1/F Coffee Shop，G/F車站大堂），原本集合地點為車站大堂，但佢地以為係1/F Coffee Shop等，一直坐係度．．．最後佢地心知不妙所以落山。

一段驚險小插曲過左，宜家最重要係番酒店食飯，因為已經天黑喇！返酒店領隊首先派發門匙，各自返房休息一陣，半小時後大家齊集餐廳內，有一樣野唔講你唔信，上山唔暈，食飯暈，奇景呢！因為天氣凍，各人都著羽絨褸，加上餐廳內冇冷氣，搞到個個面紅耳熱。

呢一餐除左食到個個興恰恰之外，都有小小娛樂o既。話說其中一個waiter，好似巴西o既Ronaldo，有位團友常嚷他為Ronaldo，而呢個waiter好似知道我地講佢（可能以前已經有人話佢似）常常報以微笑，還做出射球姿勢，在場人士都笑到碌地。言歸正傳，我覺得呢一餐真係西餐，係香港你無論食乜，上菜速度都係好快，但係呢度每一道菜都會相隔廿分鐘，而且份量少。菜單有： 1. 味精湯 2. 迷你茄汁意粉 3. 死肉豬扒伴薯仔 4. 甜品係超甜蘋果旦糕。我地和有些團友都無等到個甜品已經離坐。

之後幫襯左一間類似Citysuper o既超市，買左d朱古力做手信、水、香蕉（充飢）和喉糖（因開始熱氣）。最後我地係湖邊及火車站映相，始絡呢到係戶加上頭先真係食唔飽，所以我地“拿拿”聲返酒店“食蕉”！