跟旅行團o既唔好處就係要晨早比人morning call同埋一日搭車搭到晚。晨早起床，執拾行李（由於差不多日日都會到一個國家，所以執包袱係日日o既指定動作）。

然後去食日餐（未黎歐洲之前，已經聽歐洲o既早餐好fantastic。嘩！唔親身試過真係唔知．．．冰凍o既牛角包，一盤死肉o既火腿，用黎擺滿月o既無染色蛋蛋另加多種口味o既Yogurt（只有呢樣o野合胃口）。

今日行程係羅馬去威尼斯，途中會經過佛羅倫斯。阿領隊先生晨早o係部車度講出我地o既行程，但係cap水事件即將出現！因為呢個團唔會去比薩斜塔，有Ｄ觀光點要自費。雖然唔係強迫性但係開茶會時已講明要全團人一齊去先會去那景點，如果有一個人唔參加都唔會去，因為驚唔去那個人會走失！於是領隊話大家咁遠黎到意大利，大家係為左觀光、開心。佢就建議一場黎到不如去參觀下，不過要同我地收返車費及入場費∼EUR20 PER HEAD！全團無人反抗，甘願被cap！

好，言歸正傳，第一個景點係皮革公司，意大利出名皮革嘛！落車後慢慢步往該公司，途中穿過西方色彩o既屋及建築物，好靚。入到去，滿是日本人，呢度有皮褸、手袋、銀包．．．（只宜參觀，不宜購買。）

借完廁所，飲完水就走喇。之後就行左堤壩邊影下相，就上返旅遊車。行程繼續，到佛羅倫斯o既米高安哲奴廣場睇大衛像，當然我都會同“小雀雀”影相啦！呢度風景好唔錯，可飽覽佛羅倫斯市。好好彩，我地見到有一對中國人結婚，女穿婚紗，男穿西裝另加一個老土o既紅色「新郎」襟章。

午餐於一間「大狗餐廳」食法國餐，因為呢度有隻小牛size o既大狗（原來Debbie家姐係大慨十年前都係跟康泰黎歐洲都係黎過呢間餐廳，證明去歐洲十年如一日！）。食物有肉醬意粉（好味）、闊條麵粉餅、燒豬、薯條、水果同一大支紅酒（好飲）。

餐後開去比薩，最名不如見面，呢個塔真係好斜。我地當然影左好多藝術相，然後去觀光各商店，其中去左一間小商店，呢度係賣一d記事簿、信紙、信封，但係無郵票賣！因為我地之前買左一張postcard，呢間舖出面有個郵箱，所以想寄左佢。呢間小店cashier前有一本記事簿可以比人寫低ｄ野留念，於是我地分別用中文及英文寫低我地婚後第幾日，那個店員見到後好surprise，佢亦恭喜我地，我地亦回敬Happy New Year (因為今日係１月１日呀！)。有機會我都希望返去睇番！

大概一小時後返去巴士站集合。通常等人之際會去廁所，歐洲o既廁所，無論係邊一個國家，公廁定百貨公司都多數要比錢入o既，通常EUR 0.5（HK$5!），有d會係EUR 0.3 (HK$3)。係西方社會，乜野都貴，而且呢督尿都要HK$5！有團友講笑話淨係去廁所同買水飲都可能要用成千蚊港紙呀！

我地係比薩買左個比薩斜塔仔做手信。

由於去比薩呢程係附加，所以晚餐o既時間都推遲左。呢餐係一間好西式o既餐廳進食，有齊炒貝殼粉、炆豬腳同好難食o既蛋糕．．．d食物種類好似午餐！不過冇午餐咁好食！

返到酒店又十點多喇！沖涼、執o急、睡覺。