今朝起身感覺零舍唔同，英國o既陽光比人一種和暖感覺。照例開電視，原來做緊Winnie The Pooh，我立刻叫醒Debbie。因為佢最愛Pooh Pooh！甚至超越我，當然我唔會眼紅鍾意第二個男人。

（Debbie按：很鍾意英國，之前已經勁想黎，唔知點解，真係繼日本之後勁鍾意，可能因為英國比我感覺係好culture & modern。仲有黎到呢度就覺得好似香港，因為以前香港係英國殖民地，所以係勁似架！勁勁勁鍾意佢ｄ巴士，的士及電話亭，舊得黎好乾淨又有型！好typical London！）

梳洗之後就落去食早餐，呢個早餐同之前咁多日o既真係有天淵之別！英式早餐真係應有盡有，煎蛋、腸仔總之同香港所食o既差不多，總之正！

今日第一個景點　──　白金漢宮。另外呢到有一個女local guide叫做Chris Chan沿途介紹，佢係一位中年女性，身上掛著一把黃色鴨仔雨傘，佢講笑話帶住你地班鴨仔團。佢話今日英女皇已經外出，因為可以從旗幟方面辨別，如果佢係度就會掛國族旗，如果佢外出就會掛“米字旗”。

影完一輪相之後，我地乘坐旅遊車遊覽西敏寺，大笨鐘，London Bridge，塔橋，金融區和唐人街，每到一處佢都會好細心介紹當處特色和歷史，相當風趣抵死！

上午o既時間已經好快過，亦都到達最後一個景點　──　大英博物館。基本上入去睇一ｄ埃及和中國賊贓，在埃及那部份，有大量木乃伊同文物。

(Debbie按：木乃伊真係令我嘆為觀止！咁大個女都係第一次見，你都咪話真係有ｄ驚架！)

睇完咸魚後，又係最後午餐時候。旅行車駛至唐人街，午餐於中式酒樓內，有點心、腸粉、炒麵同炒飯，相當滋味！由於我地仲要留係英國4日，所以我地搞清楚酒店位置後就起程，Chris亦都好好人幫我地叫的士去酒店，最後我亦都羅左佢電話，如果有乜“依旭”就搵佢！

嘩！英國的士真係好唔同，係特別闊同舒服。原本佢地預計要GBP10，但最後亦只需GBP6，真係出人意表。我地住Holiday Inn Kings Cross，Check-in後，洗完個面，等一會兒就出動，返回市中心Piccadilly Circus，但係好景不常，我地搵錯左同行錯路，花左大概30分鐘才搵到地鐵站。未黎之前，ｄ人話London地鐵好難搭，我諗連日本地鐵都考我唔到，何況呢到。係購票機前睇左一陣，原來呢度係分Zone收費，Zone 1係市中心，每程為GBP2（其實呢到D路線同香港好似，好簡單，好清楚）。

去到月台，眼前景物同電影所見一樣，好古老，好大好深，但係ｄ地鐵就好細同好窄，不過ｄ座位就好好坐。一陣子就到番唐人街，一出出口，首先就碰到團友中的一對老夫婦（因為午餐後ｄ團友就有大約2小時的自由時間作最後衝刺，之後就集合到機場返香港），然後係一對母子，最後是一對澳門人。

講到呢度，我地亦要開始英國拼死睇曼聯之旅。我地自由行首站就係去Starbucks買杯Coffee暖暖先啦，呢度有香港女學生做part-time，一邊和另一個男香港學生（客人）傾計，好似講緊夜ｄ去邊度玩。之後Debbie二話不說首先買左一條頸巾（Pringle紅黑格仔Cashmere，約HK$100，因減價），因為天氣真係好凍，所以都無所謂。我地繼續行又到左Hamley玩具店，十足十一間Toy “R” Us，我提議買一隻Paddington Bear。黎到London當然不會放過去朝拜LV，但係我地又唔知係邊，我地就係唔記得邊間百貨公司裡面問個Sales喇，佢就教我地去Old Bond Street，呢條其實係一條名店街，有盡所有名牌。

到左LV，裏面顧客不多，有一位日籍Sales Lady，招呼我地，我地好似一見如故，原來佢以為我地係日本人。佢已經黎左London 3年多，係LV工作左一年。佢係咁問我地去過日本邊度，真係好似他鄉遇故知！最後我亦又一次戰敗，奉獻左一條呔及一個袋，又破費喇！

(Debbie按：個袋係我自己比錢的，你唔好係度講到咁受屈呀！但係由於我地去的時候英磅強勁，經退稅後，個袋仲貴個係香港買！)

之後，我地慢慢返酒店，途中買左KFC做晚餐，但係我地亦再一次行錯路，好奇怪o既事發生，我地問左2位本地人，佢地居然唔知Holiday Inn Kings Cross係邊同點去！經過千辛萬苦，長途跋涉返到酒店，明天我一定要攪清楚點行，唔可以再行錯！

最終我地當然行岩路啦，再享用英國o既家鄉雞。