成親後o既第3日即香港時間2003年12月30日上晚上11:45展開我地蜜月之旅 ~ 離開亞洲 ，進攻歐洲！ （好慘o既Debbie呢2日都要返工，真命苦。）

經過大慨14小時o既飛行到達左英國倫敦（由於我地個團係搭英航o既關係，第一站一定要停倫敦Heathrow機場一小時，之後再轉機去意大利o既羅馬）。

唔知我地黑仔定係乜，我地要搭接駁巴士去機場大樓，一落飛機已經感覺到歐洲冬天o既力量，經過數分鐘車程，終於到達London Heathrow 機場o既大樓。經過一般檢查後，去到大堂（由於下一班去羅馬o既飛機係一小時後），我地開始遊覽。

第一個聖地（英國時間6:00am） ~ 廁所，經過十多個小時“逼夾”兼“定型”，唔多唔少都會披頭散髮及嚴重口嗅 ~ 成個乞兒！照計一個正常人都會走去“拾”一“拾”。

(係機場我地發現Boots真係平過香港一半！)

逛多一陣，已經夠鐘上機去意大利(英國時間7:25am)．．．

o係飛機食左第一個歐洲飛機餐 ~ 奶油麵包 + Yogurt。大慨２小時後到達意大利羅馬（意大利時間9:30am）。一出機場見到個天小小陰及地濕，應該之前落過雨黎，上左旅遊巴，正式展開我地歐洲之旅，導遊開始介紹及離開機場不久之後，就開始出太陽，頃刻發現出面有彩虹！唔知呢個係咪一個好o既預兆呢！

當車子駛入羅馬城時，經過癈墟及鬥獸場等景點，但係我地第一站就係去食午飯先喎！我地去左一間中式餐館食午餐（旅行團保證每次中餐一定有八"送"一湯）。其中最特別o係個湯──炸菜什菜湯！

食飽後，正式參觀　－　梵帝崗聖彼得大教堂，由於時差o既關係今日係12月31日(大除夕)。雖然係落雨亦都無損來自各地o既天主教徒心情，紛紛入內霸位，因為今晚係呢度會有教宗主持o既子夜彌撒！

(Debbie按：梵帝崗真係好靚好宏偉，出面個廣場好大好大，好有衝動想係度狂亂咁跑發癲，但係個廣場封左，又加上落雨個地濕晒，所以冇咁做！落雨感覺都幾凍。而大教堂內真係好靚好莊嚴，有ｄ人已經坐左係兩邊等今晚的子夜彌撒，有工作人員在台上準備緊。大教堂裡面有好多告解室，裡面黑炆炆好細好窄又冇得坐！)

跟住就係「觀賞」羅馬鬥獸場。"拿"!只係「觀賞」，如要參觀則要自已「磅水」，好似10蚊歐羅！由於呢度係露天，而且開始天黑加落雨，「鬥獸」就無，「鬥縮」就有。

天開始黑，但係仲有一個景點未去 ~ 許願池。嘩！真係聞名不如見面，係電視睇成個Times Square地面廣場咁大，係現場又污“租”又細，電視o既威力真係勁，影到白雪雪又宏偉，真係好失望 (Debbie按：實際個地方真係唔係咁大，唔知電視台係咪用wide angle拍，所以比我地睇實景大好多!) o係個「兒童池」旁邊有一間好出名o既雪糕店，我地都有幫襯，都幾特別幾好味。

始終係外國o既關係，可能水土不服，所以買了一樽無氣o既泉水 (以後o既日子都係日日買一支) 。不過歐洲ｄ野真係好貴！！一支水大約EUR 0.8 – 1.5 (HK$8 – 15)，香口膠同可樂都要為返港紙十幾蚊，個排香口膠只不過係Extra牌單條裝咋喎！！(Debbie按：真係好唔捨得買可樂呢ｄ junk food呀！要成十幾蚊，又唔係必需喎，係香港十幾蚊飲死都得啦，水咁貴都冇辦法，因為一定要飲嘛！)

晚飯時間又到，原來午餐和晚餐都係同一間飯店　－　長龍飯店。而d"送"都好似無乜分別，一樣係炆肉炒菜，好似求其兜亂d野就一餐，黎緊呢十幾日都會係咁．．．